اسلام آباد (ويب ڊيسڪ) وزيراعظم شهباز شريف چيو آهي ته مان ملڪ جو خادم ۽ پاڪ فوج جي سپهه سالار سان گڏجي خدمت ڪري رهيو آهيان.
اسلام آباد ۾ يوٿ ڪنوينشن کي خطاب ڪندي وزيراعظم چيو ته ادارا پنهنجي دائرن ۾ رهي خدمت نه ڪندا ته ايندڙ نسل معاف نه ڪندا.
هن چيو ته جنهن شخص پاڪستان کي ورهايو، ان جي مجسمن سان بنگلاديش ۾ ڇا ٿيو آهي؟ وڌيڪ نه چوندس ته هڪ چوڻي آهي ته ”جهڙي ڪرڻي تهڙي ڀرڻي“.
سندس چوڻ هو ته پاڪستان ۾ دهشتگردي جي خاتمي لاءِ 70 هزار پاڪستانين جانيون ڏنيون، دهشتگردي خلاف جنگ ۾ زندگي جي هر شعبي جي فرد حصو وڌو، دهشتگردي جو خاتمو ٿي چڪو هو پر ڪجهه غلطين سبب ٻيهر اچي وئي.
شهباز شريف چيو ته دهشتگردي خلاف جنگ ۾ پاڪستان کي 150 ارب ڊالرن جو نقصان ٿيو، اسان جي معيشت کي 150 ارب ڊالرن جو نقصان ٿيو پر دنيا رڳو 20 ارب ڊالر ڏنا.
