ڪراچي (ويب ڊيسڪ) سنڌ جي ايڪسائز کاتي گاڏين جي رجسٽريشن ۽ ٽرانسفر لاءِ بائيو ميٽرڪ تصديق لازمي قرار ڏئي ڇڏي.
سنڌ جي سينيئر وزير شرجيل ميمڻ موجب نين ۽ پراڻين گاڏين جي رجسٽريشن يا ٽرانسفر جي عمل دوران بائيو ميٽرڪ تصديق جي ضرورت هوندي، نئين پاليسي تحت تبديلي ٽن مرحلن ۾ لاڳو ڪئي ويندي.
هن چيو ته پهرئين مرحلي ۾ نين گاڏين جي رجسٽريشن لاءِ بائيو ميٽرڪ تصديق لازمي هوندي، ٻئي مرحلي ۾ گاڏيون خريد ڪندڙن جي بائيو ميٽرڪ تصديق ٿيندي، ٽئين مرحلي ۾ گاڏي وڪرو ڪندڙ ۽ خريد ڪندڙ ٻنهي جي بائيو ميٽرڪ تصديق ڪئي ويندي.
سندس چوڻ هو سنڌ حڪومت ان ڳالهه کي يقيني بڻائڻ چاهي ٿي ته سنڌ عوامي خدمتن ۾ ڊجيٽلائيزيشن جي حوالي سان اڳتي وڌي، گاڏين جي رجسٽريشن ۽ ٽرانسفر ۾ بائيو ميٽرڪ تصديق شفافيت کي هٿي ڏيڻ ۾ اهم سنگ ميل آهي.
شرجيل ميمڻ چيو ته ان سان خريد ۽ وڪرو ڪندڙن جي سڃاڻپ، گاڏين جي غير قانوني منتقلي ۽ شهرين کي دوکي کان بچائڻ ۾ مدد ملندي، گاڏين جا مالڪ بائيو ميٽرڪ تصديق جو عمل مڪمل ڪرڻ لاءِ نادرا اي سهولت مرڪز يا ڪنهن به ڊسٽرڪٽ ايڪسائز آفيس سان رابطو ڪري سگهن ٿا.
