ڪراچي (ويب ڊيسڪ) عالمي مارڪيٽ ۽ ملڪ ۾ سون جو اگهه تاريخ جي بلند ترين سطح تي پهچي ويو.
آمريڪي وياج جي شرح ۾ گهٽتائي جي اميدن تي مهانگي ٿيندڙ سون کي گذريل ڏينهن يورپي سينٽرل بئنڪ جي وياج جي شرح ۾ گهٽتائي جي فيصلي نئون زور ڏنو آهي.
آل پاڪستان جيمز اينڊ جيولرز ايسوسيئيشن موجب عالمي مارڪيٽ ۾ في اونس سون جي قيمت 51 ڊالر وڌي ٻه هزار 566 ڊالر ٿي وئي آهي.
سون جو عالمي اگهه وڌڻ جو اثر پاڪستان ۾ پيو ۽ ملڪ ۾ في تولي سون جي قيمت ٻه هزار 900 رپيا واڌ سان ٻه لک 65 هزار 900 رپيا ٿي وئي آهي، اها ملڪ ۾ في تولي سون جي بلند ترين سطح آهي.
اهڙي ريت 10 گرام سون ٻه هزار 486 رپيا واڌ سان ٻه لک 27 هزار 966 رپين جو ٿي ويو آهي.
