ڪراچي(رپورٽر) پ پ چيئرمين بلاول ڀٽو زرداري چيو آهي ته عدالتي سڌارا هر صورت ۾ آڻينداسين، آئيني عدالت ضروري آهي، اسين آئيني عدالت ٺاهي پوءِ ساهه پٽنداسين ته جيئن مستقبل ۾ ڪنهن وزيراعظم کي ڦاهي جي ڦندي تي لٽڪايو نه وڃي ۽ عوام کي به انصاف ملي سگهي. ڪراچي ۾ سنڌ هائيڪورٽ بار ايسوسيئيشن جي تقريب کي خطاب ڪندي پ پ چيئرمين بلاول ڀٽو زرداري چيو ته پاڪستان جو نظام ٺيڪ ڪرڻ لاءِ ميثاق جمهوريت تي عمل ڪرڻو پوندو، آئيني عدالت لاءِ ترميم ۾ عمر جي حد مقرر ڪرڻ سان معاملو تڪراري ٿي ويندو.هن چيو ته اسان اهو به ڏٺو آهي ته اسان جا معزز جج ڪيئن ڊڪٽيٽر کي گڏجي ڪم ڪرڻ ڏيندا آهن، جنهن سان هو 10، 10 سالن جي جمهوريت ۽ آئين کي وساري ڇڏين ٿا.پيپلز پارٽي جي چيئرمين چيو ته اسان جي آئين کي ڪاغذ جو ٽڪڙو سمجهي ڦاڙيو ويو، افسوس جي ڳالهه اها آهي ته ججن آمر کي آئين ۾ ترميم جي اجازت ڏني.هن چيو ته اسان کي چيو ويو ته توهان ايترا ڪرپٽ آهيو جو توهان تي آئين ۽ قانون لاڳو نه ٿو ٿئي، پاڪستان جو جمهوري نظام اهڙو آهي جو اسان صرف هڪ پي سي او جج کي برداشت ڪري سگهون ٿا، جيڪڏهن هڪ ڀيرو پي سي او جج حلف کڻي ٿو ته پوءِ آئين ۽ جمهوريت سان ڪو به مسئلو ناهي.بلاول ڀٽو زرداري چيو ته جيڪڏهن اسان چاهيون ٿا ته اسان جي شهرين کي فوري انصاف ملي ۽ ڪنهن به صوبي جي وچ ۾ فرق نه پوي ته پوءِ وفاقي آئيني عدالت جي ضرورت آهي.هن چيو ته وفاقي آئيني عدالت ۾ هر صوبي کي برابري جي نمائندگي حاصل هوندي، هن عدالت جو چيف جسٽس روٽيشن تي هوندو ۽ هر صوبي کي پنهنجي چيف جسٽس جي نمائندگي جو موقعو ملندو.بلاول ڀٽو چيو ته جيڪڏهن توهان کي وزيراعظم، ڪنهن جج ۽ ڪنهن اداري جي نيت تي شڪ آهي ته ڪريو پر منهنجي نيت تي شڪ نه ڪريو، آئين جي بالادستي لاءِ پاڻ وڙهندس ۽ ان لاءِ ضروري آهي ته سڀني صوبن کي منصفاڻي نمائندگي ملي.هن چيو ته اسان آئيني عدالت ٺاهي رهنداسين ته جيئن ٻيو ڪو وزيراعظم وري نه لٽڪي ۽ ملڪ جي عوام کي انصاف ملي سگهي.هن چيو ته ڪنهن به جج ۾ اها جرئت نه آهي ته هو سنڌ ۾ اچي ڪالاباغ ڊيم ٺاهڻ جو اعلان ڪري، 19هين آئيني ترميم عدالت جي ڌمڪي سبب آئي، انصاف ڏياريندڙن 18هين ترميم کي ختم ڪرڻ جي ڌمڪي ڏني، پارليامينٽ کي ڌمڪيون ڏنيون ويون توهان جو سمورو آئين تبديل ڪري ڇڏينداسين، ججن جي مقرري تي نظرثاني نه ڪرڻ تي اسان کي آئين ۾ ترميم جي ڌمڪي ڏني وئي، اڄ عدالت پنهنجي ذميواري پوري ڪرڻ ۾ ناڪام وئي آهي، اسان جو عدالتي نظام ٽٽل آهي پر اسان عدليه ۾ سڌارا آڻي عدليه کي بحال ڪنداسين، هن چيو ته هو جسٽس قاضي فائز عيسيٰ ۽ جسٽس منصور علي شاهه ٻنهي جو احترام ڪري ٿو، ججن جي عمر جي حد بابت سياسي پارٽين جو اتفاق ضروري آهي، ٿي سگهي ٿو اها شرط تڪراري بڻجي وڃي، پر جيتري حد تائين آئيني عدالت جي قيام جو معاملو آهي ان حوالي سان، عمر جي حد جي شرط لاڳو نه ڪرڻ گهرجي، آئيني عدالت جي جج جي عمر بدران مدت مقرر ڪئي وڃي.خطاب بعد صحافين جي سوالن جا جواب ڏيندي پيپلزپارٽي جي چيئرمين چيو ته 63 اي جو فيصلو هڪ مقصد تحت ڪيو ويو، اسان نٿا چاهيون ته فلور ڪراسنگ آسان ٿئي، اسان چاهيون ٿا ته اهو ڪرڻ وارن کي سخت سزا ڏني وڃي ۽ جڏهن خطرو هجي ته فلور ڪراسنگ جي صورت ۾ ڪو بائيڪاٽ ٿئي ٿو. پنهنجي حلقي ۾ اليڪشن ٿيندي ته هو پنهنجي ووٽ بابت سوچيندو.هن وڌيڪ چيو ته جڏهن اهو چيو وڃي ٿو ته فلور ڪراسنگ تي پارليامينٽ جي ميمبر کي تاحيات نااهل قرار ڏنو ويندو ۽ ان جو ووٽ ڳڻيو ويندو ته پوءِ توهان جو مطلب اهو آهي ته جنهن ميمبر کي بجيٽ پسند ناهي يا هو آءِ ايم ايف جي شرطن سان متفق ناهي يا هو آئيني ترميم تي راضي نه آهي پر پوءِ توهان کيس تاحيات نااهلي جي سزا جون ڌمڪيون ڏئي ووٽ ڏيڻ تي مجبور ڪري رهيا آهيو.
