اسلام آباد (ويب ڊيسڪ) وزيراعظم شهباز شريف هدايتون ڏنيون آهن ته صوبائي حڪومتون ڊسڪوز (بجلي ورهائيندڙ ڪمپنين) کي بجلي چوري روڪڻ لاءِ پوليس ۽ مختيارڪار فراهم ڪن.
وزيراعظم شهباز شريف جي صدارت هيٺ توانائي واري وزارت ۽ پاور ڊويزن جي معاملن تي اجلاس ٿيو، جنهن ۾ وفاقي وزيرن احسن اقبال ۽ اويس لغاري سميت ٻين شرڪت ڪئي، اجلاس ۾ وزيراعظم کي مختلف معاملن تي بريفنگ ڏني وئي.
شهباز شريف چيو ته بجلي چوري جي روڪٿام، لائن لاسز گهٽائڻ، پهچ جو نظام بهتر بڻائڻ ۽ توانائي شعبي ۾ سڌارا حڪومت جي پهرين ترجيحن ۾ شامل آهن.
هن چيو ته بجلي پهچ جي 5 ڪمپنين ۾ نوان بورڊ چيئرمين، ميمبر شفاف طريقي سان مقرر ڪيا ويا، اميد آهي ته ان سان ڊسڪوز جي ڪارڪردگي ۾ بهتري ايندي، صوبائي حڪومتون ضرورت موجب بجلي چوري روڪڻ لاءِ پوليس ۽ مختيارڪار ڏين.
